પ્રક્રિયાની આણ્વીકતા એટલે શું ? તેમના પ્રકાર ઉદાહરણથી સ્પષ્ટ કરો.

પ્રાથમિક પ્રક્રિયામાં ભાગ લેતા સ્પિસીઝ (અણુ, પરમાણુ અથવા આયન)ની જે સંખ્યા એક જ સાથે અથડાઈ (સંઘાત પામી)ને રાસાયણિક પ્રક્રિયા પૂર્ણ કરવા સાથે, સંકળાયેલા હોય છે તે સંખ્યાને તે પ્રક્રિયાની આણ્વીકતા કહે છે. એક આણવીય, દ્વિ-આણવીય અને ત્રિ-આણવીય પ્રક્રિયા હોઈ શકે છે.

$(a)$ એક આણ્વીય પ્રક્રિયા : જે પ્રક્રિયામાં પ્રક્રિયા કરતી સ્પિસીઝ એક હોય તેવી પ્રક્રિયાને એક આણવીય પ્રક્રિયા કહે છે. દા.ત., એમોનિયમ નાઈટ્રાઈટ $\left( NH _{4} NO _{2}\right)$ નું વિઘટન એક આણ્વીય પ્રક્રિયા છે.

$NH _{4} NO _{2( s )} \rightarrow N _{2( g )}+2 H _{2} O _{( g )}$

$(b)$ દ્રિ-આણ્વીય પ્રક્રિયા : જે રાસાયણિક પ્રક્રિયામાં બે સ્પિસીઝ એક સાથે સંઘાતમાં સમાવિષ્ટ હોય તેને દ્વિઆણવીય પ્રક્રિયા કહે છે.

દા.ત., હાઈડ્રોજન આયોડાઈડ $(HI)$નું વિઘટન તે દ્વિ-આણ્વીય પ્રક્રિયા છે. $2 HI \rightarrow H _{2}+ I _{2}$

$(c)$ ત્રિ-આણ્વીય પ્રક્રિયા : જે રાસાયણિક પ્રક્રિયામાં ત્રણ સ્પિસીઝ એક સાથે સંઘાતમાં સમાવિષ્ટ હોય તે પ્રક્રિયાને ત્રિઆણ્વીય પ્રક્રિયા કહે છે. દા.ત., NOમાંથી $NO _{2}$ બનતી પ્રક્રિયા ત્રિ-આણ્વીય છે.

$2 NO + O _{2} \rightarrow 2 NO _{2}$

ત્રણ આણ્વીયતા ધરાવતી પ્રક્રિયાઓ ઘણી ઓછી છે અને આ પ્રક્રિયાઓ ઘણી જ ધીમી હોય છે.

$(d)$ બહુઆણ્વીય પ્રક્રિયાઓ : ત્રણ કરતાં વધારે અણુઓ એક જ સાથે સંઘાત પામે અને પ્રક્રિયા પામે તેવી સંભાવ્યતા (સંભાવના) ઘણી જ ઓછી છે. વળી આવી પ્રક્રિયા થાય તો પણ અતિ ધીમી હોય.