સહપ્રભાવિતા (Codominance) એટલે શું? મનુષ્યના રુધિરજૂથના ઉદાહરણ દ્વારા તેની વિગતવાર સમજૂતી આપો.

(N/A) સહપ્રભાવિતા એ એવી ઘટના છે જેમાં જનીન જોડના બંને વૈકલ્પિક કારકો (alleles) વિષમયુગ્મી સ્થિતિમાં સમાન રીતે અભિવ્યક્ત થાય છે,એટલે કે કોઈ પણ કારક બીજા પર પ્રભાવી કે પ્રચ્છન્ન હોતું નથી.
આ કિસ્સામાં,$F_1$ પેઢીનું સ્વરૂપ પ્રકાર બંને પિતૃઓને મળતું આવે છે.
મનુષ્યમાં સહપ્રભાવિતાનું ઉત્તમ ઉદાહરણ $ABO$ રુધિરજૂથ પદ્ધતિ છે.
$ABO$ રુધિરજૂથનું નિયંત્રણ $I$ જનીન દ્વારા થાય છે. રક્તકણોના કોષરસસ્તરની સપાટી પર શર્કરાના પૉલિમર આવેલા હોય છે,અને આ શર્કરાનો પ્રકાર $I$ જનીન દ્વારા નક્કી થાય છે.
$I$ જનીનના ત્રણ કારકો છે: $I^A$,$I^B$ અને $i$. $I^A$ અને $I^B$ કારકો થોડી અલગ પ્રકારની શર્કરા ઉત્પન્ન કરે છે,જ્યારે $i$ કારક કોઈ પણ શર્કરા ઉત્પન્ન કરતું નથી.
મનુષ્ય દ્વિતીય $(2n)$ સજીવ હોવાથી,દરેક વ્યક્તિમાં ત્રણમાંથી કોઈપણ બે કારકો હોય છે. $I^A$ અને $I^B$ કારકો $i$ પર સંપૂર્ણ પ્રભાવી છે,તેથી જ્યારે $I^A$ અને $i$ હાજર હોય ત્યારે માત્ર $I^A$ અભિવ્યક્ત થાય છે. તેવી જ રીતે,જ્યારે $I^B$ અને $i$ હાજર હોય ત્યારે માત્ર $I^B$ અભિવ્યક્ત થાય છે.
પરંતુ,જ્યારે $I^A$ અને $I^B$ સાથે હોય,ત્યારે બંને પોતાની શર્કરાની અભિવ્યક્તિ કરે છે. આને સહપ્રભાવિતા કહેવાય છે.
$ABO$ રુધિરજૂથ માટે કુલ $6$ જનીન પ્રકારો શક્ય છે.

પિતૃ $1$ માંથી કારક	પિતૃ $2$ માંથી કારક	સંતતિનો જનીન પ્રકાર	સંતતિનું રુધિરજૂથ
$I^A$	$I^A$	$I^A I^A$	$A$
$I^A$	$I^B$	$I^A I^B$	$AB$
$I^A$	$i$	$I^A i$	$A$
$I^B$	$I^A$	$I^A I^B$	$AB$
$I^B$	$I^B$	$I^B I^B$	$B$
$I^B$	$i$	$I^B i$	$B$
$i$	$i$	$i i$	$O$